Birti kynþáttaníð sem hann fékk

Tyrone Mings, varnarmaður Aston Villa og enska landsliðsins, bættist í dag í hóp enskra knattspyrnumanna sem hafa skýrt frá kynþáttaníði í sinn garð á samfélagsmiðlum.

Mings birti á Twitter skjáskot af skeyti sem honum barst á Instagram og innihélt miður skemmtileg ummæli í hans garð. Samkvæmt BBC er reikningur sendandans ennþá opinn á samfélagsmiðlinum. Mings hvetur um leið til samstöðu, en kveðst ekki vera að biðja um samúð.

Aston Villa birti í dag yfirlýsingu þar sem þessi framkoma var harðlega fordæmd og fram kom að félagið styddi dyggilega við bakið á Mings sem væri áberandi í fremstu röð í baráttunni gegn kynþáttafordómum í fótboltanum.

Meðal leikmanna sem hafa fengið álíka skilaboð síðustu daga eru Trent Alexander-Arnold, Naby Keita og Sadio Mané hjá Liverpool og Callum Robinson, sóknarmaður WBA.

Swansea, Birmingham og Rangers hafa þegar skorið upp herör gegn kynþáttaníðinu með því að hætta tímabundið á samfélagsmiðlum og skorað hefur verið á knattspyrnuhreyfinguna á Bretlandseyjum að loka alfarið á samfélagsmiðla í einhvern tíma.

• Blogga um frétt