Úrvalsdeildarleikmaður handtekinn fyrir líkamsárás

Oli McBurnie, framherji enska úrvalsdeildarfélagsins Sheffield United, sem þó er fallið úr deildinni, hefur verið handtekinn fyrir líkamsárás.

Myndband af hinum 24 ára gamla McBurnie fór í dreifingu á samfélagsmiðlum á sunnudagskvöld. Þar sést hann slá síma 21 árs gamals karlmanns, Elliott Wright, í jörðina.

McBurnie traðkar svo á símanum áður en hann slær og sparkar í Wright, sem náðist á myndbandið er síminn lá í jörðinni.

Wright sagði í samtali við The Sun að hann hefði séð McBurnie æsa sig við konu og því hafi hann kallað til hans: „Slappaðu af vinur. Þetta getur ekki verið verra en að falla.“

Hann sagði McBurnie hafa fyrirskipað sér að hætta að mynda á símann. Þegar Wright sagðist ekki vilja gera það hefði McBurnie ráðist á hann og veitt honum nokkur högg.

Lögreglan í Norður-Jórvíkurskíri á Englandi hefur staðfest að búið sé að handtaka 24 ára karlmann, þótt nafn McBurnie hafi ekki verið gefið upp í því samhengi, og er hann sem stendur í haldi lögreglu.

• Blogga um frétt