Brasilíski knattspyrnumaðurinn Alex Telles missir væntanlega af fyrstu leikjum komandi tímabils hjá Manchester United vegna ökklameiðsla.
Telles meiddist á æfingu og lék því ekki með United í 2:4-tapinu fyrir QPR í gær. „Því miður rann Alex og sneri sig á ökkla og hann verður frá næstu vikurnar,“ sagði Ole Gunnar Solskjær, knattspyrnustjóri Manchester United, við sjónvarpsstöð félagsins.
Bakvörðurinn kom til United frá Porto í október á síðasta ári og hefur leikið 24 leiki fyrir enska liðið. Hann hefur hins vegar þurft að sitja mikið á bekknum þar sem Luke Shaw hefur leikið afar vel síðustu mánuði.