West Ham fær markvörð frá París

Enska knattspyrnufélagið West Ham hefur fengið franska markvörðinn Alphonse Areola lánaðan frá París SG út komandi keppnistímabil.

Areola, sem er 27 ára gamall, kannast vel við sig í London því hann var aðalmarkvörður Fulham á síðasta tímabili, einnig í láni frá PSG, og var valinn leikmaður ársins hjá félaginu í vor.

Hann á að baki 107 mótsleiki með París SG og hefur leikið með öllum landsliðum Frakklands, þar á meðal þrjá A-landsleiki, en hefur verið lánaður til fimm félaga frá 2013, þar á meðal Real Madrid þar sem hann spilaði fjóra deildarleiki tímabilið 2019-20.

Hjá West Ham þarf hann að slást um stöðuna við pólska landsliðsmarkvörðinn Lukasz Fabianski sem hefur varið mark Lundúnaliðsins undanfarin þrjú tímabil.

• Blogga um frétt