Cristiano Ronaldo gerði sér lítið fyrir og skoraði tvö marka Manchester United þegar liðið vann Newcastle United, 4:1, í endurkomu portúgölsku stórstjörnunnar í rauðu treyjuna í ensku úrvalsdeildinni í dag.
Fyrra mark Ronaldos kom á annarri mínútu uppbótartíma fyrri hálfleiks. Mason Greenwood þrumaði þá að marki, Freddie Woodman í marki Newcastle náði ekki að halda boltanum og Ronaldo var mættur sem gammur til að koma boltanum í netið af stuttu færi, 1:0.
Þannig stóðu leikar í hálfleik.
Eftir rólega byrjun á síðari hálfleik jöfnuðu gestirnir í Newcastle metin á 56. mínútu. Þar var að verki vængbakvörðurinn Javier Manquillo eftir frábæra skyndisókn. Miguel Almirón brunaði þá fram, gaf boltann á Allan Saint-Maximin sem kom honum á Manquillo og Spánverjinn kláraði laglega, 1:1.
Ronaldo skoraði svo sitt annað mark á 62. mínútu. Þá fékk hann sendingu inn fyrir frá Luke Shaw, rak boltann inn í vítateig, lagði hann fyrir sig á vinstri fótinn og setti milli fóta Woodman, 2:1.
Landi Ronaldos, Bruno Fernandes skoraði svo þriðja markið á 80. mínútu. Hann fékk þá boltann fyrir utan teig frá Greenwood og skoraði með stórglæsilegu skoti sem söng uppi í nærhorninu, 3:1.
Á annarri mínútu uppbótartíma venjulegs leiktíma gerði varamaðurinn Jesse Lingard endanlega út um leikinn. Hann fékk þá sendingu frá Pogba, lagði boltann vel fyrir sig í vítateignum og kláraði laglega í bláhornið, 4:1
Það reyndust lokatölur og United er þar með komið upp í toppsæti ensku úrvalsdeildarinnar, að minnsta kosti um sinn.