Guardiola á að einbeita sér að þjálfun

Kevin Parker, formaður stuðningsmannafélags Manchester City, var ósáttur með ummæli Pep Guardiola, stjóra City, eftir leik City og Leipzig í A-riðli Meistaradeildarinnar á miðvikudaginn síðasta.

Leiknum lauk með 6:3-sigri City en í viðtölum eftir leik hvatti hann stuðningsmenn City til þess að fjölmenna á völlinn um helgina þegar City tekur á móti Southampton í ensku úrvalsdeildinni.

„Ég myndi vilja sjá fleiri stuðningsmenn í stúkunni,“ sagði Guardiola í samtali við BT Sport eftir sigurinn gegn Leipzig.

„Þessi ummæli komu mér mikið á óvart,“ sagði formaður stuðningsmannafélags City í samtali við The Guardian.

„Ég átta mig ekki á því hvað hann er að skipta sér af þessu. Margir stuðningsmenn liðsins eiga í miklu vandræðum með að mæta á kvöldleiki á miðvikudagskvöldum. Margir eiga börn, aðrir hafa ekki efni á því að mæta á völlinn og svo er ennþá kórónuveirufaraldur.

Hann er klárlega besti þjálfari í heiminum í dag en án þess að sýna eitthvað virðingarleysi þá á hann að einbeita sér að því að þjálfa liðið. Fólk talar meira um þessi ummæli hans eftir leikinn en frábæran leik liðsins gegn Leipzig,“ bætti Parker við.

• Blogga um frétt