Gary Lineker, knattspyrnusérfræðingur og fyrrverandi landsliðsmaður Englands og einn mesti markaskorari sögunnar þar í landi, hefur upplýst að Manchester United hafi gengið frá kaupum á Cristiano Ronaldo í garðinum sínum.
Lineker skýrði frá þessum óvenjulega gangi mála í hlaðvarpsþætti sínum, Match of the Day. Þannig háttar til að Ed Woodward, stjórnarformaður Manchester United, er náinn vinur og nágranni Linekers.
„Hann gekk frá málunum varðandi Ronaldo í garðinum hjá mér. Hann kom gangandi með símann og var að ljúka samningum við Jorge Mendes (umboðsmann Ronaldo). Ég á frábæra mynd af Ed í þessu símtali og gæti deilt því með ykkur einhvern tíma," sagði Lineker í þættinum.