Paul Pogba, miðjumaður enska knattspyrnufélagsins Manchester United, er allt annað en sáttur með enska fjölmiðla þessa dagana og þá sérstaklega götublaðið The Sun.
Í gær greindi Sun frá því að Pogba og Ole Gunnar Solskjær, stjóri Manchester United, hefðu ekki talast við síðan franski miðjumaður fékk að líta rauða spjaldið í 0:5-sigri Liverpool gegn United á Old Trafford í Manchester um síðustu helgi.
Pogba byrjaði á bekknum í leiknum en kom inn á í hálfleik og var innkoma hans vægast sagt slæm.
Hann tapaði boltanum klaufalega í upphafi síðari hálfleiks með þeim afleiðingum að Liverpool skoraði fimmta mark leiksins og nokkrum mínútum síðar fékk hann rauða spjaldið fyrir ljótt brot á Naby Keita.
„Stór lygi til þess að skrifa fyrirsagnir,“ skrifaði Pogba á Twitter en við færsluna birti hann mynd af frétt The Sun sem birtist í gær.
Big lies to make headlines pic.twitter.com/VBQiBxSuNO
— Paul Pogba (@paulpogba) October 27, 2021