Léleg stjórnun og skipulag hjá félaginu

Gary Neville vinnur nú sem sjónvarpsmaður á Sky Sports og …
Gary Neville vinnur nú sem sjónvarpsmaður á Sky Sports og sparar ekki gagnrýnina á sitt gamla félag. AFP

Gary Neville, sem lék allan sinn feril með enska knattspyrnuliðinu Manchester United, segir að í kjölfarið á brottrekstri Ole Gunnars Solskjærs í gær sé ljóst að skipulag og stjórnun hjá félaginu sé í molum.

Neville, sem spilaði 400 úrvalsdeildarleiki fyrir United á árunum 1992 til 2011, starfar nú sem knattspyrnusérfræðingur hjá Sky Sports.

„Ole Gunnar Solskjær getur ekki kvartað. Knattspyrnustjórar fá tvö til þrjú ár með lið í fremstu röð og þeir verða að skila árangri. Úrslit og frammistaða hjá liðinu undanfarna mánuði hafa verið skelfileg," sagði Neville á Sky Sports.

„Andinn í hópnum virðist vera gjörsamlega á núllpunkti núna. Leikmennirnir virðast rúnir öllu sjálfstrausti og þegar þeir spila fótbolta er eins og þeir séu með allar heimsins áhyggjur á sínum herðum. Manchester United ætlar greinilega að reyna að bjarga því sem bjargað verður til loka tímabilsins. Þeir eru með engan valkost í stöðunni. Það bíður enginn eftir því að taka við liðinu.

Þetta er bara basl og einhver viðbrögð. Þetta er í þriðja sinn sem þeir hafa gert langtímasamning eða framlengingu við knattspyrnustjóra og síðan rekið hann eftir nokkra mánuði. Skipulagið hjá félaginu hefur því verið afar lélegt," sagði Gary Neville.

mbl.is