Steven Gerrard, knattspyrnustjóri Aston Villa í ensku úrvalsdeildinni, vill fá Joe Gomez, varnarmann Liverpool í janúar. Það er Birmingham Mail sem greinir frá þessu.
Gomez, sem er 24 ára gamall, hefur aðeins komið við sögu í sjö leikjum Liverpool á tímabilinu en hann er á eftir þeim Joel Matip og Ibrahima Konáte í goggunarröðinni á Anfield.
Miðvörðurinn hefur verið óheppinn með meiðsli undanfarin tímabil en hann missti af stórum hluta síðustu leiktíðar vegna hnémeiðsla.
Gerrard, sem lék með Liverpool í sautján ár, vonast tl þess að fá Gomez á láni þegar janúarglugginn verður opnaður en Gerrard tók við stjórnartaumunum hjá félaginu á dögunum eftir að Dean Smith var rekinn.
Fimm leikmenn berjast um miðvarðastöðurnar hjá Liverpool því ásamt Gomez er Nathaniel Phillips einnig í aðalliðshóp félagsins en hann hefur einnig verið orðaður við brottför frá félaginu í janúar.