Verður Íslendingurinn rekinn frá Everton?

Rafa Benítez, knattspyrnustjóri Everton í ensku úrvalsdeildinni, er sagður vilja losna við landsliðsmanninn fyrrverandi Grétar Rafn Steinsson úr starfi. Það er Football Insider sem greinir frá þessu.

Frétt af mbl.is

Brands rekinn en Benítez nýtur fulls trausts

Í morgun bárust fréttir af því að Marcel Brands hefði verið rekinn sem yfirmaður knattspyrnumála hjá félaginu en Grétar Rafn er í dag yfirmaður leikmannakaupa hjá enska félaginu og hefur starfað náið með Brands undanfarin ár.

Benítez, sem tók við stjórnartaumunum hjá Everton í sumar eftir að Carlo Ancelotti lét af störfum, er sagður vilja fá fullt vald yfir leikmannakaupum félagsins en gengi liðsins á leiktíðinni hefur ekki verið gott.

Everton hefur eytt í kringum 300 milljónum punda í nýja leikmenn frá því Brands tók við sem yfirmaður knattspyrnumála árið 2018 en árangurinn hefur látið á sér standa.

Grétar Rafn var ráðinn yfirnjósnari félagsins í Evrópu í desember árið 2018 en var hækkaður í tign innan félagsins í október 2019 og tók þá við sem yfirmaður leikmannakaupa.

• Blogga um frétt