Hugo Lloris, fyrirliði og markvörður Tottenham og landsliðsmarkvörður Frakka, hefur framlengt samning sinn við enska félagið um hálft þriðja ár til viðbótar.
Lloris, sem er 35 ára gamall, verður nú í röðum Lundúnafélagsins fram á sumarið 2024 en hann er á sínu tíunda ári hjá Tottenham. Hann kom til félagsins frá Lyon í Frakklandi sumarið 2012 og hefur spilað 395 leiki. Aðeins tveir markverðir í sögu Tottenham eiga fleiri leiki að baki, Pat Jennings 590 leiki og Ted Ditchburn 452.
Af þessu eru 317 leikir í úrvalsdeildinni og Lloris er leikjahæsti leikmaður Tottenham í deildinni frá stofnun hennar árið 1992. Lloris hefur ennfremur ekki misst af síðustu 67 deildarleikjum liðsins.
Lloris er næstleikjahæstur í sögu franska landsliðsins með 136 landsleiki og aðeins Lilian Thuram (142) á fleiri að baki. Hann varð heimsmeistari með Frökkum 2018, vann Þjóðadeildina með liðinu á síðasta ári og fékk silfurverðlaunin á EM 2016.