Leikmenn Burnley voru í áfalli þegar þeir fengu að vita af brottrekstri Sean Dyche sem knattspyrnustjóra liðsins að sögn bráðabirgðastjórans Mike Jacksons.
„Þetta var áfall fyrir leikmenn. Nú verðum við öll að koma saman og einbeita okkur að því sem við þurfum að gera,“ sagði Jackson á blaðmannafundi.
Dyche stýrði Burnley í tæp tíu ár en fimm töp í sex leikjum og þar á meðal á móti botnliði Norwich reyndist hans banabiti. Burnley er í 18. sæti ensku úrvalsdeildarinnar, fjórum stigum frá öruggu sæti þegar liðið á átta leiki eftir.
Dyche kom Burnley í tvígang upp í efstu deild og hafnaði liðið í sjöunda sæti ensku úrvalsdeildarinnar árið 2019 og komst fyrir vikið í Evrópukeppni í fyrsta skipti í 40 ár.