Mike Jackson knattspyrnustjóri Burnley og Cristano Ronaldo framherji Manchester United voru kjörnir stjóri og leikmaður aprílmánaðar í ensku úrvalsdeildinni.
Jackson tók við liði Burnley af Sean Dyche og varð fyrsti knattspyrnustjórinn í sögu félagsins til að fara taplaus í gegnum fjóra fyrstu leiki sína í efstu deild. Lið hans náði í tíu stig í fjórum leikjum og gjörbreytti stöðu sinni í fallbaráttu deildarinnar þar sem það á nú góða möguleika á að halda sæti sínu.
Ronaldo var kjörinn leikmaður mánaðarins í annað sinn á tímabilinu og í sjötta sinn alls á ferlinum en hann var líka kjörinn í september. Ronaldo skoraði fimm mörk fyrir United í apríl, þar af þrennu í 3:2 sigri liðsins á Norwich.