Kaupin á Chelsea ganga í gegn

Todd Boehly er í forsvari fyrir fjárfestahópinn sem er að …
Todd Boehly er í forsvari fyrir fjárfestahópinn sem er að kaupa Chelsea. AFP/Glyn Kirk

Bresk stjórnvöld hafa samþykkt að veita fjárfestahópi, sem Bandaríkjamaðurinn Todd Boehly er í forsvari fyrir, leyfi fyrir kaupum á enska knattspyrnufélaginu Chelsea. Áður var enska úrvalsdeildin búin að veita samþykki sitt og geta því 4,25 milljarða punda kaup fjárfestahópsins gengið í gegn.

„Seint í gærkvöldi komst breska ríkisstjórnin að þeirri niðurstöðu að henni væri unnt að veita leyfi fyrir sölunni á Chelsea,“ sagði talsmaður ríkisstjórnarinnar í morgun.

Vegna refsiaðgerða breskra stjórnvalda í garð rússneska auðkýfingsins Romans Abramovich í tengslum við innrás Rússlands í Úkraínu, þar sem Abramovich er sagður náinn Vladimír Pútín Rússlandsforseta, vildi breska ríkisstjórnin ganga úr skugga um að Abramovich myndi ekkert hagnast á sölunni.

Stóð hnífurinn í kúnni um nokkurt skeið vegna þessa en bresk stjórnvöld una nú þeim aðgerðum sem hafa verið settar á fót og sjá til þess að allur hagnaður sem hefði runnið í vasa Abramovich verði þess í stað lagður inn á frystan bankareikning, þaðan sem öll upphæðin mun renna til góðgerðarmála.

mbl.is