Enski knattspyrnumaðurinn Raheem Sterling nálgast Chelsea og býst Manchester City, núverandi félag hans, við tilboði frá Chelsea í kappann í dag.
Thomas Tuchel, þjálfari Chelsea hefur mikinn áhuga á að fá Englendinginn í sínar raðir. Hann er sagður hafa talað við Sterling um plön næstu leiktíðar og hvernig hann myndi passa í liðið. Frá þessu greinir skysports.
Sterling, sem er aðeins 27 ára, er flestum kunnugur enda búinn að vera með betri mönnum deildarinnar síðustu ár. Hann hefur skorað 131 mark í 339 leikjum fyrir Manchester City síðan hann kom frá Liverpool árið 2015. Englendingurinn hefur einnig unnið fjóra Englandsmeistaratitla, fjóra deildarbikara og enska bikarinn einu sinni með City.
Hann hefur einnig verið fastamaður í enska landsliðinu.