Enski miðvörðurinn James Tarkowski er genginn í raðir enska knattspyrnufélagsins Everton. Hann kemur á frjálsri sölu frá Burnley og skrifaði undir fjögurra ára samning í Bítlaborginni.
„Ég er metnaðarfull manneskja, ég vil áorka einhverju, ég vil vinna hluti og ég er kominn hingað til þess að ná árangri,“ sagði Tarkowski í samtali við heimasíðu Everton.
Fleiri félög voru áhugasöm um að tryggja sér þjónustu Tarkowski, þar á meðal Aston Villa, en hann ákvað að velja Everton eftir að hafa rætt við Frank Lampard, knattspyrnustjóra liðsins.
Tarkowski er fyrsti leikmaðurinn sem Everton fær til liðs við sig í sumar.