Ráku Touré eftir níu leiki

Kolo Touré, fyrrverandi varnarmaður Arsenal og Manchester City, náði aðeins að stýra B-deildarliðinu Wigan í níu leikjum en honum var sagt upp störfum í kvöld.

Touré var ráðinn til Wigan í nóvember þegar Leam Richardson var sagt upp störfum eftir slakt gengi liðsins á tímabilinu. Honum tókst ekki að snúa gengi þess við, uppskar aðeins tvö stig af 27 mögulegum í níu leikjum, og þar með var þolinmæði forráðamanna Wigan á þrotum.

Wigan situr nú á botni B-deildarinnar, fjórum stigum frá öruggu sæti. Tvær vikur eru í næsta leik liðsins og finna á nýjan stjóra á næstu dögum.

• Blogga um frétt