Eigandinn hætti við ítalska landsliðsmanninn

Bandaríkjamaðurinn Bill Foley, eigandi enska knattspyrnufélagsins Bournemouth, ákvað að hætta við að festa kaup á ítalska landsliðsmanninum Nicolo Zaniolo þar sem honum þótti félagið hafa eytt nægilega háum fjárhæðum í janúarglugganum.

Sky Sports greinir frá.

Zaniolo, sem er hæfileikaríkur og fjölhæfur sóknarmaður, vill burt frá Roma en hafnaði því upphaflega að ræða við Bournemouth.

Honum snerist hins vegar hugur í morgun en kom þá að tómum kofanum hjá Bournemouth, sem eru nýliðar í ensku úrvalsdeildinni og í harðri fallbaráttu.

• Blogga um frétt