„Ég er enn stoltur af leikmönnunum,“ sagði Mikel Arteta knattspyrnustjóri Arsenal í samtali við BT Sport eftir ósigur á útivelli gegn Everton í ensku úrvalsdeildinni í fótbolta í dag.
Everton gerði sér lítið fyrir og vann toppliðið í fyrsta leik hins nýráðna knattspyrnustjóra, Sean Dyche, en James Tarkowski skoraði sigurmarkið á 60. mínútu með skalla eftir hornspyrnu.
„Við sáum mikið af boltanum en okkur vantaði staðfestu og gæði á síðasta þriðjungi vallarins.
Við fengum mörg færi en þegar við fengum á okkur markið þá hægðu þeir á leiknum og þetta varð erfitt fyrir okkur. Við náðum ekki að stýra leiknum og gáfum of margar óþarfa aukaspyrnur.
Þetta verður enginn dans á rósum. Þetta verður erfitt og við þurfum að gefa allt sem við eigum í framhaldið og spila betur en við gerðum í dag.“