„Mér líkar að vinna 1:0. Við höfum lagt mikið á okkur í vikunni og hreinskilni leikmanna hefur verið okkur ómetanleg,“ sagði Sean Dyche, nýráðinn knattspyrnustjóri enska úrvalsdeildarfélagsins Everton, í samtali við BBC eftir sigurinn á toppliði Arsenal á Goodison Park í ensku úrvalsdeildinni í hádeginu í dag.
Everton gerði sér lítið fyrir og vann góðan heimasigur í fyrsta leik Dyche en James Tarkowski skoraði sigurmarkið á 60. mínútu með skalla eftir hornspyrnu.
Aðspurður sagðist þessi litríki knattspyrnustjóri hafa lagt upp með að halda hreinu og skora í leiknum.
„Við reyndum að troða fimm vikna undirbúningstímabili á eina viku. Við gáfum leikmönnum urmul upplýsinga og þeir hafa tekið vel á móti. Þetta er góð byrjun og svo sem ekkert meira en það.
Stuðningsmennirnir munu hjálpa okkur. Þeir voru magnaðir í dag og við þurfum að skila þeim einhverju til baka.
Við þurfum að halda okkar vinnu áfram og halda áfram að bæta okkar leik.“