Manchester United er komið í undanúrslit ensku bikarkeppninnar eftir dramatískan sigur á Fulham á Old Trafford í dag, 3:1.
Fulham byrjaði betur en heimamenn komust betur inn í leikinn þegar leið á fyrri hálfleikinn. Heilt yfir var fyrri hálfleikur frekar jafn og bæði lið áttu ágætis rispur án þess að komast í nein dauðafæri.
Það var öllu meira líf í seinni hálfleiknum. Fulham byrjaði seinni hálfleikinn eins og þann fyrri, betur en heimamenn. Liðið gerði harða hríð að marki United á fyrstu fimm mínútunum og De Gea þurfti í tvígang að taka á honum stóra sínum.
Gestirnir fengu fjórar hornspyrnur á stuttum tíma og fjórða spyrnan varð að marki á 50. mínútu þegar Diop hælaði boltann glæsilega inn á markteiginn þar sem Mitrovic átti ekki í vandræðum með að koma boltanum yfir línuna, 1:0 Fulham í vil.
Um miðjan seinni hálfleikinn komust heimamenn í góða sókn sem endaði með því að Sancho komst einn inn fyrir og fram hjá Leno, markverði Fulham. Hann náði skoti á markið en Willian varði boltann á línu með höndinni.
Hræðileg mistök hjá Willian sem fékk rautt spjald eftir að Kavanagh hafði farið í skjáinn. Aleksandar Mitrovic var ekki hrifinn af dómgæslunni og lét það berlega í ljós. Hann reifst og skammaðist og sagði vel valin orð við Kavanagh og stuggaði svo við dómaranum. Þá var hann umsvifalaust sendur í bað. Marco Silva, þjálfari Fulham, var þá sendur upp í stúku í látunum. Liðsmenn Fulham misstu hausinn algjörlega.
Bruno Fernandes skoraði af öryggi úr vítaspyrnunni og jafnaði metin, 1:1.
Tveimur mínútum síðar labbaði Luke Shaw með boltann í gegnum vörn Fulham og upp að endamörkum. Hann fann svo Marcel Sabitzer í markteignum og Austurríkismaðurinn setti boltann skemmtilega fram hjá Leno með hælspyrnu, 2:1.
Róðurinn var orðinn þungur fyrir Fulham sem var nánast það sem eftir lifði leiks á eigin vallarhelmingi.
Bruno Fernandes gerði endanlega út um leikinn með firnaföstu skoti úr teignum á 6. mínútu viðbótartíma en sjö mínútum var bætt við.
Rauða spjaldið og rauðu spjöldin breyttu leiknum og Manchester United sigldi í undanúrslit enska bikarsins þar sem liðið mun mæta Brighton. Í hinum undanúrslitaleiknum mætast Manchester City og Sheffield United. Leikið verður 22. apríl.
Mbl.is fylgdist með gangi mála og færði ykkur allt það helsta úr leiknum í beinni textalýsingu.