Guardiola hló þegar talið barst að United

Pep Guardiola, knattspyrnustjóri Manchester City, ræddi í dag við fjölmiðla fyrir leik liðsins við Rauðu stjörnuna frá Serbíu í Meistaradeild Evrópu í fótbolta sem fram fer annað kvöld.

City hefur farið gríðarlega vel af stað á tímabilinu og er eina liðið sem er með fullt hús stiga eftir fimm umferðir í ensku úrvalsdeildinni og var Guardiola spurður út í toppbaráttuna.

„Arsenal lék mjög vel í gær og er frábært lið. Liverpool er svo aftur í baráttunni og andinn er góður þar,“ byrjaði Guardiola. Blaðamaður skaut þá inn í og spurði um Manchester United.

Spánverjinn byrjaði að því að hlæja og svaraði svo: „Þetta hefur verið erfið byrjun, eins og hjá Chelsea, en þetta er alltaf Manchester United. Liðið mun finna taktinn,“ sagði sá spænski.

• Blogga um frétt