Vill verða aðalmarkvörður Liverpool

Georgíumaðurinn Giorgi Mamardashvili vill verða aðalmarkvörður enska knattspyrnufélagsins Liverpool um leið og hann mætir næsta sumar. 

Liverpool keypti Mamardashvili frá Valencia á 25 milljónir punda síðasta sumar en lánaði hann aftur út til spænska félagsins. 

Hann hefur því varið mark Valencia þetta tímabilið en á því næsta verður hann í herbúðum Liverpool. 

Brasilíumaðurinn Alisson hefur verið aðalmarkvörður Liverpool undanfarin ár og verið með betri markvörðum heims. Þá hefur varamarkvörður liðsins Caoimhín Kelleher fengið mikið lof þegar hann hefur stigið inn í fjarveru Alisson. 

Óljóst er hvað gerist í markvarðarmálum Liverpool næsta sumar en Mamardashvili, sem er í landsliðsverkefni með Georgíu, sagði á blaðamannafundi að skýrt markmið hans væri að verða aðalmarkvörður hjá Liverpool-liðinu. 

• Blogga um frétt