Liverpool er Englandsmeistari

Liverpool er enskur meistari karla í knattspyrnu í 20. skipti eftir að hafa sigrað Tottenham Hotspur í 34. umferð ensku úrvalsdeildarinnar á Anfield í dag, 5:1.

Liverpool er komið með 82 stig þegar fjórar umferðir eru eftir en Arsenal er með 67 stig í öðru sæti og getur ekki lengur náð Liverpool að stigum.

Þar með hefur Liverpool jafnað við erkifjendurna í Manchester United sem hafði unnið enska meistaratitilinn oftast allra, 20 sinnum, síðast árið 2013.

Leikmenn Liverpool hlýða á The Kop og aðra á Anfield syngja "You'll Never Walk Alone" eftir leikinn. AFP/Paul Ellis

Gríðarleg stemning var á Anfield í dag eins og vænta mátti en aðeins sló á hana á 12. mínútu. Þá skoraði Dominic Solanke, fyrrverandi leikmaður Liverpool, glæsilegt skallamark eftir hornspyrnu James Maddisons frá hægri og Tottenham var óvænt komið yfir, 1:0.

Virgil van Dijk og Harvey Elliott baða knattspyrnustjórann Arne Slot í kampavíni. AFP/Paul Ellis

Það stóð þó ekki lengi. Á 16. mínútu slapp Dominik Szoboszlai inn í vítateiginn hægra megin og sendi fyrir á Luis Díaz sem skoraði, 1:1. Markið var reyndar dæmt af til að byrja með en í ljós kom að Szoboszlai var ekki rangstæður og markið gott og gilt.

Alisson Becker og Arne Slot fagna í leikslok. AFP/Paul Ellis

Og átta mínútum síðar var fjörið á Anfield orðið enn meira. Á 24. mínútu vann Ryan Gravenberch boltann af varnarmanni við vítateigslínuna og náði að ýta honum á Alexis Mac Allister sem skoraði með miklum þrumfleyg með vinstri fæti upp í hægra markhornið, 2:1.

Liverpool lét kné fylgja kviði og á 34. mínútu tók Mac Allister hornspyrnu frá hægri. Cody Gakpo náði boltanum og skaut úr miðjum vítateig í vinstra hornið, 3:1, og þannig var staðan í hálfleik.

Luis Diaz fagnar eftir að hafa jafnað fyrir Liverpool á 16. mínútu AFP/Paul Ellis

Gakpo hefði getað skorað fjórða mark Liverpool á 49. mínútu en hann skaut ekki í dauðafæri, einn gegn markverði, og sending til hliðar mistókst.

Mohamed Salah urðu hins vegar ekki á nein mistök á 63. mínútu þegar hann skoraði langþráð mark eftir nokkra þurrð undanfarið. Hröð sókn Liverpool, Szoboszlai renndi boltanum á Salah sem lék til vinstri inn í vítateiginn og skaut í hægra hornið niðri, 4:1.

Szoboszlai var allt í öllu í sóknarleik Liverpool í dag og var óheppinn að bæta ekki við fimmta markinu eftir sendingu frá Salah á 66. mínútu. Hann komst einn gegn Vicario markverði sem varði vel frá honum.

Luis Díaz og Alexis Mac Allister fagna eftir að Mac Allister kom Liverpool í 2:1 með glæsilegu skoti. AFP/Paul Ellis

Veislan hélt áfram á 69. mínútu þegar Destiny Udogie varð fyrir því óláni að senda boltann í eigið mark þegar Trent Alexander-Arnold sendi inn í markteiginn þar sem Salah beið í dauðafæri, 5:1.

Liverpool var með öll tök á gangi mála það sem eftir lifði leika og var nær því að bæta við mörkum en Tottenham að laga stöðuna.

Mohamed Salah tekur mynd af sjálfum sér með stuðningsmönnum Liverpool eftir að hafa skorað fjórða markið í dag. AFP/Paul Ellis

Í leikslok braust síðan út gríðarlegur fögnuður og enska meistaratitlinum fagnað innilega á Anfield. "You'll Never Walk Alone" hljómaði tugþúsundraddað í uppbótartíma leiksins.

Liverpool	5:1	Tottenham	Opna lýsingu Loka
90. mín. Darwin Nunez kominn í dauðafæri einn gegn markverði en hann velur að renna til hliðar á Salah og sendingin er of föst. Salah nær að renna út á Elliott sem skýtur í varnarmann. Þarna átti sjötta markið að koma!
Augnablik — sæki gögn...

• 1 blogg um fréttina

Bloggað um fréttina

• Jóhann Elíasson: NÚ ER TITILLINN HELD ÉG ALVEG ALVEG ÖRUGGUR...........