Newcastle missteig sig í Meistaradeildarbaráttunni

Brighton og Newcastle gerðu jafntefli, 1:1, í 35. umferð ensku úrvalsdeildar karla í knattspyrnu í Brighton í dag. 

Newcastle er með 63 stig í fjórða sæti deildarinnar og geta Chelsea og Nottingham Forest jafnað liðið að stigum með sigrum í þeim leikjum sem þau eiga inni. Brighton er með 52 stig í tíunda sæti. 

Yankuba Minteh, fyrrverandi leikmaður Newcastle, kom Brighton yfir á 28. mínútu en undir lok leiks fékk Newcastle víti þegar Fabian Schär tók aukaspyrnu sem fór í höndina á Yasin Ayari. 

Alexander Isak steig á punktinn og skoraði af öryggi, 1:1. 

Þá gerðu West Ham og Tottenham jafntefli í Lundúnaslag, 1:1, á London-leikvanginum. 

Wilson Odobert kom Tottenham yfir á 15. mínútu en Jarrod Bowen jafnaði metin á þeirri 28., 1:1. 

West Ham er í 17. sæti með 37 stig en Tottenham er sæti ofar með stigi meira. 

• Blogga um frétt