Son kærir tvennt fyrir fjárkúgun

Son Heung-Min, fyrirliði Tottenham Hotspur, hefur lagt fram kæru á hendur konu á þrítugsaldri og karli á fimmtugsaldri í heimalandi sínu Suður-Kóreu vegna fjárkúgunar.

Breska ríkisútvarpið skýrir frá því að konan og karlinn hafi verið handtekin í Gangnam í Seúl, grunuð um fjárkúgun og tilraun til fjárkúgunar.

Kúgunin laut að því að konan laug því að Son að hún bæri barn hans undir belti og hafi á síðasta ári krafist peninga til þess að halda því leyndu.

Karlinn hafi svo fylgt því eftir í mars síðastliðnum og krafið Son um að greiða sér pening vegna óléttu konunnar, sem reyndist ekki vera ólétt.

Í tilkynningu frá lögmannsteymi Sons segir að hann sé augljóslega fórnarlambið í málinu.

• Blogga um frétt