Íþróttir | Enski boltinn | mbl | 3.7.2025 | 18:20 | Uppfært 19:05

Læknar ráðlögðu Jota að fljúga ekki

Mikill fjöldi fólks hefur lagt leið sína að Anfield, heimavelli Liverpool, í dag til að votta Diogo Jota virðingu sína. AFP/Paul Barker

Knattspyrnumaðurinn Diogo Jota var á leiðinni til Englands eftir sumarfrí í Portúgal þegar hann lést í bílslysi á Spáni seint í gærkvöld.

Jota gekkst nýverið undir aðgerð á lunga og læknar ráðlögðu honum af þeim sökum að fljúga ekki til Englands.

Slysstaðurinn nálægt bænum Cernadilla í norðvesturhluta Spánar. AFP/Cesar Manso

Hann ætlaði því að fara landleiðina frá Porto til Santander á Norður-Spáni, ásamt bróður sínum André Silva. Það er um 640 kílómetra vegalengd, svipað og frá Reykjavík til Egilsstaða, og þeir voru um það bil hálfnaðir á þeirri leið þegar slysið átti sér stað við smábæinn Cernadilla í Zamora-héraði, um klukkan 01.30 að staðartíma á Spáni, um 23.30 að íslenskum tíma.

Diogo Jota með Englandsmeistarabikarinn á Anfield í lok síðasta tímabils. AFP/Paul Ellis

Jota ætlaði síðan að fara með ferju frá Santander til Englands en æfingar Liverpool eftir sumarfríið eiga að hefjast á mánudaginn kemur.

Lögregluyfirvöld í Zamora-héraði skýrðu frá því að allt benti til þess að hjólbarði á bifreið bræðranna hefði sprungið þegar þeir óku fram úr annarri bifreið með þeim afleiðingum að hún valt og eldur kom upp í henni. Bræðurnir hefðu verið úrskurðaðir látnir á slysstað.