Leikmaður vikunnar er Aron Þormar Lárusson.
Aron Þormar er 22 ára FIFA-spilari hjá Fylki en spilar einnig með landsliðinu.
Aðspurður segir hann að æfingaplan sitt sé ekki frábrugðið öðrum, hann spilar þegar tími gefst og mætir á sínar æfingar. Mikilvægast sé þó að huga vel að andlegri og líkamlegri heilsu, þar sem hún skipti öllu máli.
Aron spilaði smávegis í PES áður en hann fékk sinn fyrsta FIFA-fótboltaleik á árunum 2005-2006 en það er hans helsti leikur til spilunar í dag.
Núna segir hann að skemmtilegast sé að spila á mótum og fyrir hönd Íslands en telur rafíþróttamenningu á Íslandi ekki nógu stóra. Framþróun rafíþrótta á Íslandi síðastliðið ár kemur honum ekki á óvart, enda eru rafíþróttir skemmtilegt sjónvarps- og umtalsefni.
Aron segir alla tilfinningaflóruna koma upp þegar verið er að spila FIFA en það fari í raun eftir því hvernig gengur. Hægt er að fylgjast með Aroni á Twitter og á Twitch.