Íþróttir | Rafíþróttir | mbl | 7.5.2022 | 7:07

RÍSÍ gefið tvær milljónir í verðlaun

Rafíþróttasamtök Íslands, RÍSÍ. Grafík/Rafíþróttasamtök Íslands

Íslenskir atvinnumenn í Counter-Strike: Global Offensive hafa notið góðs af síðasta tímabili, en Rafíþróttasamtök Íslands hafa nú þegar gefið tvær milljónir í verðlaunafé á skömmum tíma.

Óhætt er að segja að möguleikar íslenskra rafíþróttamanna séu að færast í aukana, hvort sem um ræðir þátttöku á erlendri grundu eða atvinnumennsku í þessarri vaxandi senu hér á landi.

Ljósleiðaradeildin kláraðist fyrir mánuði síðan og í beinu framhaldi af henni hófst þriggja þátta mótaröð sem endaði með Stórmeistaramótinu. Keppendur fengu vegleg verðlaun auk þess að sigurvegarar fengu keppnisrétt í umspilsmóti fyrir Blast Series mótaröðina.

Frétt af mbl.is

Úrvalsdeildin búin en nóg framundan

Verðlaun sífellt veglegri

Verðlaun fyrir árangur og frammistöðu í rafíþróttum færast í aukana hér sem annarsstaðar, en eins og fyrr var getið hafa Rafíþróttasamtök Íslands veitt keppendum tvær milljónir í gegnum Ljósleiðaradeildina og Stórmeistaramótið. Þar af var hálf milljón í verðlaunapotti Stórmeistaramótsins sem rann til efstu tveggja sætanna.

Deildarmeistarar og Stórmeistarar þessa árs, Dusty, fékk 252.500 krónur fyrir sigur á Ljósleiðaradeildinni sem kláraðist fyrir um mánuði síðan. Fyrir annað sætið fékk Þór 232.500 krónur og Vallea 222.500 fyrir það þriðja.

Staða Ljósleiðaradeildarinnar ásamt upplýsingum um verðlaun. Skjáskot/Liquipedia

Verðlauna öllum fyrir vinnu sína

Athygli vekur á að allir keppendur Ljósleiðaradeildarinnar fengu vegleg verðlaun fyrir þátttöku í Ljósleiðaradeildinni.

Hvort sem um er að ræða sigurvegara eða liðið í neðsta sæti, en Fylkir sem lenti í neðsta sæti, fékk 177.500 krónur fyrir þátttöku sína í deildinni.

„Deildarskiptingin er á þá leið að við viljum greiða öllum fyrir vinnuna. Liðið í neðsta sæti mætir í jafn marga leiki og efsta,“ segir Aron Ólafsson, framkvæmdastjóri RÍSÍ, í samtali við mbl.is.