Íslenska liðið Atgeirar hefur verið býsna farsælt undanfarið og þar að auki unnið þrjú lanmót í röð með glæsibrag. Síðast unnu þeir helgarmót í Overwatch sem fór fram fyrr í mánuðinum. Liðið heldur næst á Helgarmótið í Overwatch þegar það spilar í úrvalsdeildinni dagana 17. og 18. september.
Í samtali við mbl.is segir Fannar Logi Bragason, þjálfari Atgeira, að Hollywood-leikarinn Keanu Reeves hafi spilað lykilhlutverk fyrir síðasta helgarmót í Overwatch, þá fyrir hlutverk sitt í kvikmyndinni Speed.
„Fyrir helgarmótið í Almenna horfðum við saman á Speed með Keanu Reeves einu sinni í viku á Discord,“ segir Fannar Logi Bragason „TheChosenOne“, þjálfari Atgeira, í samtali við mbl.is.
„Við gerðum þetta og við unnum mótið.“
Aðspurður segir hann myndina fjalla um rútu sem má ekki stoppa, því ef hún stoppar eða hægir á sér þá springur hún.
„Þannig háttum við okkur yfirleitt í keppnunum.“
Atgeirar kváðust þó ekki hafa verið að æfa mikið undanfarið en séu nú að fara að koma boltanum af stað þar sem Almenni er að hefjast á ný.
Fannar og leikmenn Atgeira munu líklega velja aðra kvikmynd til þess að horfa næst á þar sem þeir horfðu á myndina um það bil sjö sinnum á síðasta tímabili.
„Ég er búinn að vera að pæla í því hvaða mynd við ættum að horfa á, en það er bara engin eins góð og Speed með Keanu Reeves.“
Leikmenn Atgeira bentu þó á framhaldsmynd Speed, þá Speed 2: Cruise Control en hún fjallar um bát sem má ekki stoppa.
Liðið er nokkuð öruggt með sig fyrir komandi tímabil og helgarmót í Overwatch og hlakkar til að mæta keppnisliðinu NÚ á ný.
NÚ spilaði á sínu fyrsta lanmóti síðustu helgi og bjuggust Atgeirar við að sjá liðið í úrslitum þar sem keppnislið NÚ í Overwatch samanstendur m.a. af reynslumiklum og góðum leikmönnum.
Kom það Atgeirum því mjög á óvart þegar þeir mættu Hauki Bauki í úrslitum í stað NÚ.
„Við erum bara með treyjur og horfum á Keanu Reeves - og við vinnum samt!“
Atgeirar sögðust þó reikna með því að NÚ komi sterkari inn í helgarmótið, en bæði lið spila í úrvalsdeild helgarmótsins, dagana 17. til 18. september.