Lionel Messi á vígvellinum

Fótboltamenn gera oft stóra auglýsingasamninga en þetta gæti verið sá merkilegasti lengi.

Lionel Messi ásamt tveimur vel þekktum fótboltamönnum, Neymar Jr. og Paul Pogba, munu vera aðgengilegir í skotleiknum Call of Duty: Modern Warfare 2 sem spilanlegar persónur.

Nokkrar af stórstjörnum fótboltans. Skjáskot/Activision

Sneisafullur mánuður

Þessi viðbót í leikinn er hluti af Modern Warfare FC viðburðinum og geta spilarar keypt þessar sérútgáfur af persónum í skotleiknum.

Ásamt þessum viðburði er Call of Duty að gefa út leikhaminn Warzone 2 sem viðbót við leikinn sinn en sú viðbót er gjaldfrjáls öllum.

Activision, leikjaframleiðandi Call of Duty, fer í samstarf við þessar stjörnur með það í huga að fótbolti verður á vörum margra komandi vikur þar sem HM í fótbolta hefst síðar í mánuðinum.

Myndir sýna leikmennina í baráttuklæðum. Skjáskot/Activision

Hver leikmaður fær sinn eigin útgáfudag þar sem Neymar Jr. kemur fyrstur 21. nóvember, svo Paul Pogba þann 25. nóvember, og að lokum kemur Lionel Messi 29. nóvember.

• Blogga um frétt