Formúlu 1 ökuþórinn Alex Albon talaði um tíma sinn hjá liðinu Red Bull Racing í viðtali nýlega. Albon ræddi um erfiðleika sína hjá liðinu en hann náði aldrei þeim árangri sem ætlast var til af honum.
Hann lenti þó nokkrum sinnum í ljótum árekstrum en útskýrði í viðtalinu að keyra bílinn væri eins og að spila Call of Duty á hæstu hreyfistillingu sem hægt væri að stilla í leiknum. „Það þurfti ekki nema blása á stýrið og þá beygði bíllinn,“ sagði hann.
Þegar hreyfistilling er sett í botn þarf ekki nema að hreyfa aðeins við músinni eða stýripinnanum og spilari snýst í marga hringi í Call of Duty. Stillingin er oft notuð ætli spilari að ná flottu myndskeiði og þekkist það vel að reyna við „360-no scope“ en þá snýr spilari sér í heilan hring áður en reynt er að ná fellu.
Albon talaði þó vel um liðið og segist skilja ástæðuna fyrir því að bíllinn hafi verið stilltur svona. „Max Verstappen var númer 1 hjá liðinu, hann var að stefna að heimsmeistaratitli og það sá það hver maður innan liðsins,“ sagði hann.
Alex Albon endaði í sjöunda sæti ökuþóra þetta tímabil og missti sætið sitt til Sergio Pérez sem hefur verið hjá Red Bull síðan.
Nýtt tímabil í Formúlu 1 hefst um helgina 3.-5. mars og keyrir Alex Albon fyrir Williams.