Vegna hryðjuverkanna í London í morgun voru öryggisráðstafanir hertar í dag í nágrenni kappakstursbrautarinnar í Silverstone þar sem breski kappaksturinn í Formúlu-1 fer fram um helgina.
Leitað var í farangri allra sem komu til brautarinnar í dag en þar var að mestu um starfsmenn keppnisliðanna og fulltrúa annarra kappakstursgreina sem fram fara í brautinni næstu þrjá daga.
Skipuleggjendur kappakstursins segjast sannfærðir um að öryggisráðstafanir vegna mótsins sem gripið hafi verið til strax í framhaldi af tilræðunum í London séu fullnægjandi.
Uppselt er í stúkur brautarinnar alla daga og er gert ráð fyrir 100.000 gestum í Silverstone á sunnudag.