Jenson Button hjá McLaren hefur lýst stuðningi við hugmyndir fyrrum formúluþórsins Juan Pablo Montoya um hvernig megi hressa upp á keppni í formúlu-1 svo um munar.
Montoya segir að með því að fjarlægja úr keppnisbílunum hitanema fyrir bremsur og hjólabúnað bílanna, þar með talin dekkin, myndi keppnin gjörbreytast á svipstundu.
Montoya keppti á sínum tíma með Williams og McLaren og segir að ökumenn séu orðnir hálf aðgerðalausir því þeir fái svo miklar upplýsingar um dekk og bremsur frá verkfræðingum meðan á keppni stendur.
„Verði nemarnir bannaðir reynir að nýju á aksturstilfinningu ökumannanna,“ segir Montoya. Spurður um ummæli hans segir Button: „Þannig var það áður fyrri. Enginn var að tilkynna þér um hita hér og þar svo maður varð að hafa það á tilfinningunni hvort hitastigið væri að hækka um of. Juan Pablo hefur rétt fyrir sér. Aldrei hafði mér komið til hugar að við ættum eftir að deila sömu skoðun,“ segir Button.