Íþróttir | Formúla 1 | mbl | 1.3.2016 | 9:36

Toro Rosso í endanlegu útliti

Mynd 1 af 3 Max Verstappen (t.v.) og Carlos Sainz svipta keppnisbíl Toro Rosso hulum í Barcelona í morgun.

Mynd 2 af 3 Max Verstappen (t.v.) og Carlos Sainz svipta keppnisbíl Toro Rosso hulum í Barcelona í morgun.

Mynd 3 af 3 Max Verstappen (t.h.) og Carlos Sainz með kepepnishjálma sína í Barcelona í morgun.

Toro Rosso sýndi 2016-bíl sinn í endanlegu útliti í morgun, við upphaf seinni lotu bílprófana vetursins. Er hann knúinn Ferrarivél á ný, eftir nokkurra ára samtarf liðsins við Renault.

Grunnliturinn er djúpblár með purpurarauðum svæðum hér og þar. Er það í raun sami grunntónninn og verið hefur á bílunum frá því Toro Rosso kom til sögunnar árið 2006, er Red Bull keypti Minardiliðið.

Max Verstappen mun aka bílnum í dag en Carlos Sainz á morgun.

„Við erum stolt af þessum bíl og fyrir hvað hann stendur varðandi þá vinnu sem lögð hefur verið í hönnun hans og þróun. Þá hefur hann verið smíðaður á methraða í nýrri bílsmiðju okkar í Faenza [á Ítalíu],“ sagði liðsstjórinn Franz Tost við athöfnina.

Toro Rosso varð í sjöunda sæti af 10 liðum í stigakeppni formúlu-1 í fyrra. Besti árangur liðsins varð fjórða sæti Verstappen í bæði ungverska kappakstrinum í Búdapest og þeim bandaríska í Austin í Texas.