Lewis Hamilton hjá Mercedes var í þessu að vinna ráspól brasilíska kappakstursins, sinn sextugasta pól á ferlinum, eftir eitilharða og jafn keppni við liðsfélaga sinn Nico Rosberg.
Í lokatilrauninni sótti Rosberg mjög að Hamilton, var hraðskreiðari á tveimur fyrstu tímasvæðunum af þremur en gerði smávægileg mistök undir lok hringsins og varð þar af leiðandi tíundu úr sekúndu á eftir.
Í þriðja sæti varð Kimi Räikkönen hjá Ferrari og liðsfélagi hans Sebastian Vettel var fimmti því Max Verstappen hjá Red Bull komst upp á milli þeirra.
Þriðju rásröðinni á morgun deilir Daniel Ricciardo hjá Red Bull með Vettel.
Franski ökumaðurinn Romain Grosjean hjá Haas átti eina sína bestu tímatöku á árinu er hann varð í sjöunda sæti. Fyrsta tuginn á rásmarkinu fylltu svo Nico Hülkenberg og Sergio Perez hjá Force India og Fernando Alonso hjá McLaren.
Heimamaðurinn Felipe Massa hjá Williams varð aðeins 13. og liðsfélagi hans Valtteri Bottas ellefti.