Verstappen er samningsbundinn Red Bull út árið 2019 en sögur hafa verið á kreiki þess efnis að Mercedes hafi lengi sýnt honum áhuga. Einnig hefur hann ítrekaður verið sagður á leið til Ferrari.

Mercedes gerði hosur sínar grænar fyrir Verstappen er hann keppti í Evrópuröð formúlu-3 og bauðst til að taka hann upp á arma sína en hann valdi fremur að fara til Red Bull.

Belgísk-hollenska ökumanninum hefur gengið brösuglega í ár vegna endingarskorts keppnisbíls Red Bull. „Hanner óþolinmóður eins og allt ungt fólk. En hann er nógu raunsær til að átta sig á að það er margt gott í pípunum hjá okkur,“ segir liðsstjórinn Christan Horner, spurður hvort Verstappen kynni að vilja faratil annars liðs.

Verstappen er í sjötta sæti í stigakeppni ökumanna og er 50 stigum á eftir liðsfélaga sínum, Daniel Ricciardo. Hefur hann aðeins komist einu sinni á verðlaunapall það sem af er vertíðar, er hann hreppti þriðja sæti í kínverska kappakstrinum í Sjanghæ.

Verstappen sagðist vera að „tapa trúnni“ á bíl Red Bull eftir að bilun í kúplingu felldi hann úr leik í austurríska kappakstrinum. Sömuleiðis sagðst hann hafa áhyggjur yfir því hvort Renault leggi liðinu til öflugri og betri keppnisvél í bíla Red Bull 2018.

Horner játar, að Red Bull þurfi að geta lagt Verstappen í hendur bíl sem keppa má á til sigurs standi því hugur til að framlengja dvöl  Verstappen hjá liðinu.