Mercedes með forskot segir Lauda

Lewis Hamilton sinnir aðdáanda í Melbourne í dag.
Lewis Hamilton sinnir aðdáanda í Melbourne í dag. AFP

Niki Lauda, stjórnarformaður Mercedesliðsins, kveðst á því að nýr keppnisbíll liðsins tryggi því ögn forskot á önnur lið. Sé geta hans aðeins meiri en annarra.

Heimsmeistarinn Lewis Hamilton varar Lauda við og kveðst ekki svo viss sem hann.

Í framhaldi af þróunarakstri liðanna í Barcelona á dögunum eru spekingar sem fylgdust með gangi mála þar á því að silfurörvarnar séu öflugustu bílarnir á rásmarkinu. Sérstaklega hafi mikil ferð þeirra í löngum aksturslotum virst kröftugur.

Lauda segir 2018 bílinn vel gerðan en telur þó að forskot hans  á aðra bíla jafngildi aðeins nokkrum sekúndubrotum.

„Undirbúningur okkar  fyrir vertíðina var betri en undanfarin ár og því get ég farið til Melbourne með býsna gott sjálfstraust. En ég sé okkur fyrir mér af svipaðri getu og Red Bull og Ferrari.

Ég sé okkur í mesta lagi tveimur brotum á undan Red Bull og þar á eftir kemur Ferrari. 2018-bíllinn er auðveldari í akstri, hraðinn í beygjum var með ólíkindum og áhorfendur munu kunna að meta það. Bíllinn er og aðeins háværari,“ sagði Lauda sem á sínum tíma varð heimsmeistari í formúlu-1 þrisvar sinnum.

Hamilton kveðst trúa því að Mercedes hafi smíðað mjög samkeppnisgóðan bíl fyrir 2018-vertíðina. Hann reyndi þó að draga úr væntingum. „Á þessum tíma árs reyna menn að gera mikið úr getu annarra liða, til að setja pressuna á þau. Það minnkar álagið á þann sem spáir.“

mbl.is