Tvöfalt hjá Ferrari

Sebastian Vettel á Ferrari tímasetti lokatilraun sína á lokaæfingunni fyrir tímatökuna í Melbourne í morgun og hrifsaði til sín toppsætið á lista yfir hröðustu hringi æfingarinnar.

Næsthraðast fór liðsfélagi hans Kimi Räikkönen og á óvart kom að Marcus Ericsson á Sauber varð þriðji.

Brautir voru blautar er æfingin hófst en undir lokin hafði húnn þornað og því var hægt að skjota þurrdekkjum undir bílana í blálokin. Þessir þrír fyrstu voru reyndar þeir einu sem náðu að brúka almýkstu dekkjagerðina sem ökumenn höfðu til boða á æfingunni.

Fjórða besta tímann setti Max Verstappen á Red Bull, þann fimmta Carlos Sainz á Renault og heimamaðurinn Daniel Ricciardo á Red Bull setti sjötta besta tímann. Vegna aðstæðna segir æfingin þó ekki mikið um getu bíla því til að mynda urðu Mercedesmennirnir Valtteri Bottas og Lewis Hamilton í aðeins sjöunda og áttunda sæti. Þá munaði heilum átta sekúndum á tíma fyrsta og tíunda manns.

mbl.is