Ferrari réði lögum og lofum í kappakstrinum í Barein þótt sigur og stigafjöld rynni liðinu úr greipum á lokahringjunum. Bjargaði öryggisbíll því að Charles Leclerc hélt þriðja sætinu að lokum.
Leclerc hafði lengst af verið með örugga forystu er vélarbilun hægði það mjög á honum að báðir ökumenn Mercedes-Benz komust fram úr í lokin.
Leclerc hafði meðal annars sett nýtt brautarmet og unnið sinn fyrsta ráspól í formúlu-1. Liðsfélagi hans Sebastian Vettel deildi fremstu rásröðinni með honum. Var það í 62. mótinu í sögu formúlu-1 sem báðir bílar Ferrari hefja keppni af fremstur rásröð. Með því jafnaði ítalska liðið árangur bæði Williams og McLaren en met þeirra hafði staðið árum saman.