Bæði Ferrari og Renault mættu til leiks í Sjanghæ með nýja íhluti í vélar keppnisbílanna.
Ferrari hefur skipt um rafeindastýribox beggja bíla og hið sama hefur verið gert í vélum Haas-liðsins en þær eru frá Ferrari fengnar.
Þá hefur verið skipt um tvinnbúna (MGU-K) þriggja bíla sem eru knúnir Renaultvélum; báðum bílum Renault og einnig McLarenbíl Lando Norris. Carlos Sainz mun áfram brúka sama íhlut er hann fékk skipt um í Barein vegna bilana í hinum fyrri í Melbourne.
Ökumenn mega skipta tvisvar um þennan vélkerfisbúnað á keppnistíðinni án þess að hljóta afturfærslu á rásmarkinu.