Tveir liðsmenn Haas í formúlu-1 eru komnir í einangrun að eigin frumkvæði í Melbourne en þar fer Ástralíukappaksturinn fram á sunnudag.
Munu þeir dveljast lokaðir af frá umheiminum þar til rannsókn leiðir í ljós hvort þeir eru smitaðir af kórónuveirunni eða ekki, að sögn talsmanns Haas-liðsins.
„Þeir sýndu viss einkenni þess að hafa tekið sóttina, komu sér í rannsókn og einangruðu sig síðan, eins og vera ber, þar til niðurstaðan liggur fyrir,“ sagði hann.
Á vef tímaritsins Autosport segir auk þessa, að einn liðsmaður McLaren sé í sjálfseinangrun.