Hamilton ók eins og sönnum heimsmeistara sæmir

Lance Stroll skorti herfræðikænsku til að halda toppsæti í tyrkneska kappakstrinum af ráspól. Um miðbik keppninnar missti hann allt úr höndum sér er keppinautarnir höfðu étið upp forskot hans og varð níundi í mark.

Lewis Hamilton sneri á sama tíma afar erfiðri stöðu sér í hag, komst í fyrsta sæti þegar þriðjungur hringjanna 58 var ófarinn og sigldi í mark með miklum yfirburðum. Vann hann þar heimsmeistaratitil ökumanna íi sjöunda sinn og sinn 94. kappakstur í formúlu-1.

Með árangrinum jafnaði hann titlafjölda Michaels Schumacher.

Návígin voru líklega fleiri í þessu móti en öðrum og hjálpar þar til að bleyta var á brautunum sem aldrei þornuðu nógu mikið til þurrdekk yrðu sett undir bílana.

Ferrari gladdist sennilega meira en önnur lið þar sem Sebastian Vettel sýndi hve mikilli reynslu hann býr yfir með því að aka til þriðja sætis. Liðsfélagi hans Charles Leclerc varð fjórði.

Hraðasta hring kappakstursins átti Lando Norris hjá McLaren.