Mónakóinn Charles Leclerc á Ferrari verður á ráspól í Spánarkappakstrinum í Formúlu 1 á morgun eftir að hafa borið sigur úr býtum í tímatökunni í dag. Leclerc fær því gott tækifæri til að bæta í forskot sitt á toppnum í keppni ökuþóra.
Leclerc tryggði sér ráspólinn með glæsilegum síðasta hring. Ríkjandi meistarinn Max Verstappen, sem var í efsta sæti þar til Leclerc fór upp fyrir hann, tókst ekki að svara því Red Bull-bíll hans bilaði í síðasta hring.
Verstappen náði samt sem áður öðru sæti. Carlos Sainz á Ferrari var þriðji og George Russell á Mercedes í fjórða sæti.