Ferrari fagnar sínum fyrsta sigri á tímabilinu

Spænski ökuþórinn Carlos Sainz vann Formúlu 1 kappaksturinn í Singapúr í dag eftir hörkubaráttu á síðustu hringjunum.

Sainz byrjaði fremstur í dag eftir frábæran tímatökuhring í gær og átti hann ekki síðri dag í dag þegar hann varð sá fyrsti til þess að vinna kappakstur á tímabilinu og vera ekki í liði Red Bull.

Síðustu hringirnir voru æsispennandi þar sem Sainz varðist glæsilega gegn Lando Norris, George Russell og Lewis Hamilton sem voru á hælum hans síðustu 7 hringina.

Allt stefndi í verðlaunapall fyrir Russell en á síðasta hringnum missti hann stjórn á bílnum sínum og hafnaði í veggnum og því varð Lewis Hamilton þriðji í mark á eftir Sainz og Lando Norris.

Red Bull liðið sá aldrei til sólar um helgina en bíllinn virtist ekkert líkur þeim bíl sem ökuþórarnir hafa keyrt á tímabilinu hingað til. 

Efstu 5 ökuþórarnir í dag:

1. Carlos Sainz
2. Lando Norris
3. Lewis Hamilton
4. Charles Leclerc
5. Max Verstappen

• Blogga um frétt