Grétar og Ellert fara til Bolton

Skagamennirnir Grétar Rafn Steinsson og Ellert Jón Björnsson munu halda til Englands í næstu viku og æfa með enska úrvalsdeildarliðinu Bolton.

Grétar Rafn sagði í gær að þeir félagar færu til Bolton með því hugarfari að öðlast reynslu og jafnframt til þess að vera betur í stakk búnir fyrir komandi verkefni með 21 árs landsliði Íslands síðar í haust, gegn Skotum og Litháen.

"Við erum báðir samningsbundnir ÍA til næstu tveggja ára en það er alltaf gaman að fara utan til þess að sjá hvar maður stendur í samanburði við hina. Hvað svo verður í framhaldinu vitum við ekki," sagði Grétar en þeir verða í rúma viku hjá félaginu. Um helgina mætir ÍA liði Fylkis í lokaumferð Íslandsmótsins og sagði Grétar að umræðan væri ákaflega skrítin um stöðu Skagamanna í þeim leik. "Það er hrein og klár móðgun við okkur sem íþróttamenn ef einhverjir halda að við ætlum að gefa eitthvað eftir gegn Fylki til þess að gera KR-ingum grikk. Staðan er einföld, Fylkir þarf að vinna sinn leik til þess að verða Íslandsmeistari og ég get lofað því að við leggjumst ekki flatir fyrir Fylki, sagði Grétar.