Pressan verður á Tottenham

Massimiliano Allegri, þjálfari Ítalíumeistara Juventus, telur að pressan verði á Tottenham þegar liðin mætast á Wembley í síðari viðureign liðanna í 16-liða úrslitum Meistaradeildar Evrópu í knattspyrnu.

Liðin skildu jöfn, 2:2, í Torinó í kvöld eftir að Juventus hafði komist í 2:0 eftir níu mínútna leik.

„Tottenham brást vel við eftir að hafa lent 2:0 undir en við gerðum okkur seka um mistök. Við vorum ekki með nógu marga menn frammi og við áttum í erfiðleikum.

Við spiluðum á móti líkamlega sterku og tæknilega góðu liði. Við þurfum að spila mjög vel í London til að komast áfram en pressan verður á liði Tottenham í þeim leik. Juventus hefur aldrei verið talið sigurstranglegra liðið í 16-liða úrslitunum svo möguleikar okkar eru 50% fyrir leik og 50% eftir leik,“ sagði Allegri.

• Blogga um frétt