Landsliðsmaðurinn Gylfi Þór Sigurðsson, leikmaður enska úrvalsdeildarliðsins Everton, meiddist illa á hné í leik Everton og Brighton á laugardaginn.
Gylfi varð fyrir meiðslum á liðböndum í hné en hann fer til frekari skoðunar hjá sérfræðingum í dag að því er Ólafur Már Sigurðsson bróðir Gylfa sagði í samtali við mbl.is í morgun. Ekki var hægt að greina meiðslin til hlítar í gær þar sem hnéð var mjög bólgið og læst en það verður gert í dag. Ekki er víst að liðböndin hafi slitnað en úr því fæst skorið í dag.
Ljóst er að Gylfi Þór verður frá keppni í einhvern tíma. Það gætu orðið einhverjar vikur eða mánuðir en ef allt fer á versta veg gæti hann misst af heimsmeistaramótinu í Rússlandi en fyrsti leikur íslenska landsliðsins verður gegn Argentínumönnum 16. júní. Það yrði gífurlegt áfall fyrir landsliðið ef Gylfi yrði ekki með enda hann er algjör lykilmaður í liðinu.
Gylfi haltraði af velli í seinni hálfleik en hann virtist hafa snúið upp á hnéð. Eftir aðhlynningu utan vallar kom hann aftur inn á og lék leikinn til enda sem Everton vann, 2:0.