Skipuleggja læti fyrir framan liðsrútuna

Hluti stuðningsmanna Liverpool er búinn að skipuleggja óblíðar móttökur er liðsmenn Manchester City mæta á Anfield fyrir leik liðanna í átta liða úrslitum Meistaradeildar Evrópu. 

Fyrri leikur liðanna fer fram á Anfield 4. apríl næstkomandi. Einhver hluti stuðningsmanna Liverpool hefur ákveðið að hittast fyrir framan völlinn, tveimur tímum fyrir leik, til að sprengja flugelda, kveikja á blysum og vera með mikil læti, er rúta City-manna keyrir inn á völlinn. 

Stuðningsmennirnir gáfu leikmönnum Villarreal sömu móttökur fyrir leik liðanna í Evrópudeildinni árið 2016 og hefur lögreglan í Liverpool varað við handtökum og ákærum, verði af athæfinu. 

„Við vitum hvað hluti stuðningsmanna Liverpool ætlar að gera fyrir leikinn gegn Manchester City 4. apríl næstkomandi. Það verður mikil löggæsla á leiknum til að tryggja að allir geti notið þess að horfa á fótbolta í öruggu umhverfi.“

„Það verða fleiri lögregluþjónar við störf en venjulega og biðjum fólk um að vinna með okkur og ekki kveikja á blysum eða á flugeldum fyrir leik. Lögreglan tekur á öllu slíku og getur það endaði með handtökum og fangelsisvist,“ segir í yfirlýsingu sem lögreglan í Liverpool sendi frá sér í dag. 

• Blogga um frétt